მთავარი აქტუალური თემა სპორტი ნიჩბოსნობის პოტენციალი და იდეალური ბუნებრივი რესურსი

ნიჩბოსნობის პოტენციალი და იდეალური ბუნებრივი რესურსი

თეთრი არაგვი

საქართველოში ნიჩბოსნობის სახეობებიდან ყველაზე გავრცელებული ჯომარდობაა (Rafting). ძირითადად, ის სამოყვარულო დონეზე – დამსვენებლებზე და მძაფრი შეგრძნებების მაძიებელ ადამიანებზეა გათვლილი.

ჩვენს ქვეყანაში 26 000-მდე მდინარეა. მათ შორის, რამდენიმე (ალაზანი, რიონი, მტკვარი, ცხენისწყალი, ტეხური, თეთრი არაგვი და სხვ.) სპორტის ამ სახეობისთვის განსაკუთრებით ხელსაყრელია. მდინარე თეთრი არაგვის პირას ჯომარდობის მსურველები ყოველდღიურად მოდიან. ტურისტების მიღებამდე, ნიჩბოსნები მდინარეს კარგად სწავლობენ. ამიტომ გაუთვალისწინებელი შემთხვევები თითქმის არ ხდება (ზოგჯერ ნიჩაბი თუ დაიკარგება). ნავით ერთი ადამიანის დაშვება საშუალოდ, 30-50 ლარი ღირს (ნავზე მინიმუმ, 5 ადამიანი უნდა მოთავსდეს). ადამიანების ნაკლებობის შემთხვევაში, დაშვების საფასური იზრდება.

მდინარის გზის სირთულე დონეების მიხედვით განსხვავდება (1-6ბ+). ტურისტებისთვის მდინარეზე პირველიდან მე-4 დონემდე დაშვებაა შესაძლებელი. ზოგს უფრო რთული გზის გადალახვა სურს. თერგზე ჯომარდობა მარტივი არ არის. ასეთი სირთულის გზებზე ტურისტების დაშვებას საჯომარდო ბაზები მაქსიმალურად თავს არიდებენ. რთული გზის გავლისას ხილვადობაც იკლებს. ამიტომ დაშვებამდე გზის კარგად შესწავლა აუცილებელია. გარდა ამისა, ფიზიკური მონაცემები და კრიტიკულ სიტუაციებში სწრაფი რეაგირებაც გადამწყვეტ როლს ასრულებს. პროცესი საკმაოდ აზარტული და საინტერესოა.

ფასანაურის ერთ-ერთ ბაზაზე, კარავში ბელორუსიელი ტატიანა სულიმა 2 კვირაა, ქმართან ერთად ცხოვრობს. ისინი საკუთარ სანიჩბოსნო კლუბს ფლობენ, რომელიც ამჟამად, ბელორუსიელი ნიჩბოსნების საქართველოში ჩამოყვანას ემსახურება. „ – საქართველოში ნიჩბოსნობისთვის იდეალური მდინარეებია. ამ დარგის განვითარებაში მონაწილეობა გვინდა, თუმცა შესაძლებლობა არ გვაქვს. ნიჩბოსნობის შესწავლისთვის თუ განვითარებისთვის საჭირო სისტემა ჩამოყალიბებული არ არის. სპორტის ამ სახეობის მიმართ ბავშვებს მეტი ინტერესი უნდა გაუჩნდეთ,“ – ამბობს ტატიანა სულიმა. მალე ბელორუსიიდან საქართველოში 50-კაციანი ჯგუფი ჩამოვა. ისინი, ტატიანას და მისი ქმრის დახმარებით, საქართველოს ტერიტორიაზე რამდენიმე მდინარეს გაეცნობიან.

ზაზა ნადირაძე (ფოტო: Canoe Kayak)

ამ ეტაპზე, ქართულ ნიჩბოსნობაში ყველაზე წარმატებული 24 წლის ზაზა ნადირაძე გახლავთ, რომელმაც ბოლო ოლიმპიადაზე საკმაოდ კარგი შედეგი აჩვენა (სამწუხაროდ, ასპარეზობისას ნიჩაბი ხელიდან გაუსხლტა. ამის გამო, დრო დაკარგა და გამარჯვება ვერ მოიპოვა). ამჟამად, ზაზა მომდევნო ოლიმპიადისთვის (2021 წ.) ემზადება. საქართველოში ნიჩბოსნობის სპორტული მიმართულებით განვითარება, ბუნებრივი რესურსების ფონზე, ლოგიკური იქნება და ჩვენს ქვეყანას დამსახურებულ წარმატებას მოუტანს.

ჯომარდობა

Pepper