მთავარი პიროვნება პროფესია გამოყენებითი მათემატიკოსი და IT მეწარმე – IT უკვე ყველა სფეროსთან დაკავშირებულია

გამოყენებითი მათემატიკოსი და IT მეწარმე – IT უკვე ყველა სფეროსთან დაკავშირებულია

ლევან კილაძე

ლევან კილაძეს პროგრამირების მიმართ ინტერესი ადრეულ ასაკში გაუჩნდა. ცოდნას ქუჩაში გასაყიდად გამოტანილი წიგნებიდან და ჟურნალებიდან იღებდა. ამასობაში, დამკვეთს ვებსაიტი „დაუწერა“ და ჯიბის ფულიც გაუჩნდა. თავდაპირველად, უნივერსიტეტში განათლების მიღებას ეკონომიკის მიმართულებით ფიქრობდა, თუმცა არჩევანი გამოყენებითი მათემატიკის ფაკულტეტზე შეაჩერა.

თავის დამკვიდრება

ამ სფეროში კარგ სპეციალისტზე მოთხოვნა ძალიან მაღალია. თუ ხარისხიან პროდუქტს მისაღებ დროში და ბიუჯეტში ქმნი, მარტივია, „ხმა გაგივარდეს“. ადრე ინტერნეტი და IT(Information Technology) ცალ-ცალკე ინდუსტრია იყო, თუმცა IT უკვე ყველა სფეროსთან დაკავშირებულია.

სფეროს სპეციფიკა

პროდუქტის დასრულების შემდეგ, მომხმარებელი მის გამოყენებას მაშინვე იწყებს. ინტერნეტში პოზიტიური გამოხმაურებები გამარჯვების და თვითკმაყოფილების შეგრძნებას იწვევს. საქართველოში გაყიდვები სირთულეს წარმოადგენს. საკუთარ მოთხოვნებში ჩამოყალიბებული დამკვეთი იშვიათია. ბიზნეს-კონსულტანტების ფუნქციის შეთავსება IT სპეციალისტებს უწევთ.

მიღწევები

ამჟამად, ყველაზე მეტად პროდუქტით – Snapfie ამაყობს, რომელიც ჯერ მომხმარებლებს არ უნახავთ, თუმცა facebook-ის წარმომადგენლებს უკვე მოეწონათ და თავიანთ ინკუბატორში მიიღეს. საჩუქრები და სან ხოსეში მიწვევაც გამოგზავნეს. ამ სფეროს „ზვიგენებთან“ თანამშრომლობა ძალიან დიდი მიღწევაა.

გამოცდილების დაგროვება

ლენკოს კომპანია „ლემონდო“ do-ზე (კეთებაზე) ორიენტირებულია. მისი პრინციპი – „ვაკეთოთ და განვვითარდეთ“ გახლავთ. თანამშრომლებმა გამოცდილება საქმის კეთებით დააგროვეს.

ალბათ, როგორც სხვა სფეროებში, განვითარებისთვის ყველაზე მნიშვნელოვანი 3 რამ არის:

1. საბაზისო ცოდნა, რომელიც სკოლებში და უნივერსიტეტებში ისწავლება;
2. თვით განვითარება – ონლაინ კურსები და ცოდნის დაგროვება;
3. სადმე მუშაობის დაწყება, თუნდაც – დაბალი ხელფასის სანაცვლოდ.

მხოლოდ წიგნით განვითარება შეუძლებელია.

ღირებულებები

ამ საქმეში არ არსებობს ე.წ. “ნედლეული”, კომპანიის პროდუქტი არის ის, რასაც გუნდის წევრები ქმნიან. წარმატება თანამშრომლების პროფესიონალიზმის და მათი შემართების შედეგია, Lemondo-ს პროდუქციას ყოველდღიურად მილიონობით ადამიანი იყენებს. მთავარი ღირებულებები გუნდზე ზრუნვა და მისი განვითარებაა. მეგობრულ გარემოში მუშაობენ.

რჩევა დამწყებ პროგრამისტებს

მთავარია, რაც გიყვარს, ის საქმე აირჩიო, დაძლიო სიზარმაცე და აკეთო გაუჩერებლად. თავდაპირველად, ჯობია, დაბალი ბიუჯეტით მაღალი ხარისხის პროდუქტის შექმნა სცადო და ამ გზით ხალხს საკუთარი უნარები აჩვენო. კარგმა პროგრამისტმა პროგრამირება საფუძვლიანად უნივერსიტეტში უნდა შეისწავლოს.

Pepper.ge