მთავარი სოციალური ცხოვრება ფაუნა გადარჩენილი ჯიში – კავკასიური ნაგაზები ძაღლსაშენიდან

გადარჩენილი ჯიში – კავკასიური ნაგაზები ძაღლსაშენიდან

ბაგირა, ნუცა, ჯორჯია, ბოთა… ტერიტორიაზე, სადაც მალე თბილისის ზოოპარკის ნაწილი გადავა, კავკასიური ნაგაზები უკვე ბინადრობენ. ძაღლსაშენი, რომელიც წელიწადნახევრის წინ დაარსდა, ერთ მიზანს ემსახურება – ჯიში არ უნდა გადაშენდეს! ამის საფრთხე კი დროთა განმავლობაში შეიქმნა. საბჭოთა პერიოდის დასაწყისში, კავკასიური ნაგაზების დიდი რაოდენობა საქართველოდან რუსეთში გაიყვანეს, თუმცა ამის კონკრეტული მიზეზი დღემდე უცნობია. ჩვენს ქვეყანაში აღნიშნული ჯიშის კრიტიკულად შემცირების შემდეგ, კავკასიური ნაგაზის რუსეთიდან საქართველოში დაბრუნება დაიწყო.

,,2 წლის წინ იტალიელი კინოლოგები იყვნენ მოსულები, რომლებიც პარლამენტის დავალებით მსოფლიო მასშტაბით, მწყემს ძაღლებს ეძებდნენ. კავკასიური ნაგაზის მიმართ დიდი ინტერესი ჰქონდათ, თუმცა სამწუხაროდ წყალდიდობამ შეგვაფერხა და მათთან მოსალაპარაკებლად ვეღარ მოვიცალეთ. მთავარი ისაა, რომ კავკასიური ნაგაზი მსოფლიოში დიდ ინტერესს იწვევს.“ გვითხრა თბილისის ზოოპარკის დირექტორმა, ზურა გურიელიძემ.

კავკასიური ნაგაზი მსოფლიოს კინოლოგური ფედერაციის მიერ 328-ე ნომრადაა რეგისტრირებული. ქართული ნაგაზი 2001 წელს საქართველოს კინოლოგიური ფედერაციის მიერ დარეგისტრირდა, თუმცა ქვეყნის საზღვრებს ჯერ ვერ გასცდა. ,,მსოფლიო რეგისტრაციისთვის დიდი თანხაა საჭირო. ამით კი ჩვენს ქვეყანაში არავინ ინტერესდება“- გვითხრა საქართველოს კინოლოგიური ფედერაციის პრეზიდენტმა, ზოოპარკის სამეურნეო მენეჯერმა, გია გიორგაძემ.

ძაღლსაშენს კომერციული დატვირთვა არ აქვს. მწყემს ძაღლებს ამრავლებენ და მეცხვარეებს ურიგებენ. 12 კავკასიური ნაგაზიდან, ყველა მდედრია. თითოეულ მათგანთან კინოლოგი მუშაობს. შეჯვარება ყველანაირი წესის დაცვით ხდება – ჯიში ჯიშს უნდა შეესაბამებოდეს.

ძაღლსაშენში მატებას ელოდებიან. ,,ძაღლი რომ გალამაზდება, დადინჯდება და გაზარმაცდება, უკვე ეტყობა რომ ფეხმძიმედაა“ – ამბობს გია გიორგაძე. როცა ცხოველი ბუნებრივ პირობებში არ არის და ენერგიასაც ნაკლებად ხარჯავს, მას მშობიარობისას დახმარება სჭირდება. ძაღლსაშენში ჩემი სტუმრობის პერიოდში, ერთ-ერთი მშობიარე ნაგაზი კინოლოგთან ჰყავდათ წაყვანილი. 5 ლეკვიდან, 3 დაუხრჩვია. გადარჩენილი ლეკვები კი ამჟამად კინოლოგის დაკვირვების ქვეშ იმყოფებიან.

მეცხვარე მეტ-ნაკლებად ყინვაგამძლე ჯიშია, თუმცა ზამთარში შესაბამისი პირობების შექმნა მაინც სჭირდება. თითოეულ ვოლიერში, ყველა ძაღლს თივით დამთბარი ბუნაგი აქვს.

კავკასიური და ქართული ნაგაზის გარდა, ძაღლსაშენში ჩაქირას, იგივე ქართული მყეფარას, კვერნაზე მონადირე ჯიშის, ერთი ძაღლიც ცხოვრობს, რომელიც გურიიდან, სოფელ მაკვანეთიდან ჩამოიყვანეს.

ქართული მყეფარას ჯიში ტაო-კლარჯეთის ტერიტორიაზე დარჩა. საქართველოში კი დღეს მხოლოდ ორ ოჯახს ჰყავს, გურიასა და აჭარაში. თურქეთი დღესაც ამტკიცებს, რომ ჩარიქა თურქული ჯიშია.

pePPer.ge