მთავარი აქტუალური თემა მუზეუმი გიორგი ლეონიძის სახლ-მუზეუმი

გიორგი ლეონიძის სახლ-მუზეუმი

გიორგი (გოგლა) ლეონიძე 1899 წლის 27 დეკემბერს, სოფელ პატარძეულში დაიბადა. პატარძეულზე უსაზღვროდ შეყვარებულმა გიორგი ლეონიძემ საკუთარ სოფელს არაერთი ლექსი მიუძღვნა. მწერლის სახლ-მუზეუმი უამრავ მოგონებას ინახავს.

გიორგი ლეონიძის სახლ-მუზეუმს ძირითადად, სკოლის მოსწავლეები სტუმრობენ. მაისის ბოლოს ან ივნისის დასაწყისში გოგლაობას აღნიშნავენ. ამ პერიოდში, სოფელში სხვადასხვა ღონისძიება ტარდება.

გიორგი ლეონიძის სახლ-მუზეუმი, პირველ რიგში, მწერლის სახელს, შემდეგ კი იმ ექსპონატებს ინახავს, რომლებსაც გოგლა სიცოცხლეში იყენებდა.

გოგლას მამა – ნიკოლოზი სასულიერო პირი იყო. პატარძეულში, შიოს ტაძარში მსახურობდა. ის სახლ-მუზეუმის ეზოშია დაკრძალული.

გოგლას ძმა – ლევანი 1937 წლის 5 ოქტომბერს დახვრიტეს. დაოჯახებამდე გოგლა ლელი ლორთქიფანიძეზე იყო შეყვარებული. ლელის ოჯახმა გიორგი ლეონიძე, როგორც ხელმოკლე ოჯახის შვილი, სასიძოდ დაიწუნა და ქალიშვილი სხვა კაცზე გაათხოვა. ლელის თავი მოუკლავს, თუმცა მიზეზის შესახებ არაფერია ცნობილი. ამის მერე, გოგლამ ცოლად ეფემია გედევანიშვილი შეირთო.

გიორგი ლეონიძე 1966 წელს გარდაიცვალა. მის დაბადების დღეს – 27 დეკემბერს პატარძეულში ყოველთვის აღნიშნავენ. ამ დღესთან დაკავშირებით, გოგლა ლეონიძის სახელობის სკოლა ღონისძიებებსაც მართავს.

სახლ-მუზეუმის მისაღებ ოთახში მდებარე სუფრა გოგლას ძმის მეუღლემ – გერმანელმა მარია ხოფმანმა თავად მოქარგა. გერმანელი ქალი პატარძეულს ძალიან კარგად შეეწყო. გოგლა რძალს ძმისშვილების გაზრდაში ეხმარებოდა.

გოგლამ სხვადასხვა სახლ-მუზეუმთან (მათ შორის – ილია ჭავჭავაძის) ერთად, თბილისში ლიტერატურის ისტორიის მუზეუმიც დაარსა, რომელსაც შემდეგ მისი სახელი მიენიჭა. აღნიშნულ მუზეუმს მწერალმა ნიკო ფიროსმანის სურათები მოუპოვა და უსასყიდლოდ გადასცა.

ეს ის ადგილია, სადაც სტუმართმოყვარე გოგლა მეგობრებს მასპინძლობდა. გოგლას თუთის ხე ძალიან ჰყვარებია. თურმე, ამ ხეზე შემოჯდებოდა ხოლმე და წერდა.

გიორგი ლეონიძის გარდაცვალების შემდეგ, სახლი სახელმწიფოს უსასყიდლოდ გადაეცა.

გოგლას ორი გოგონა – ნესტანი და თინათინი ჰყავდა. ორივე გარდაცვლილია. შვილიშვილები (ორივე გიორგი) თბილისში ცხოვრობენ. გიორგი გვინჩიძეს სახლში მუზეუმიც აქვს.
გოგლა პატარძეული ძალიან უყვარდა. სოფელში წყალმომარაგება და ელექტროენერგიის მიწოდება მისი ინიციატივით დაიწყო.